CEBU, Philippines - Nabuak ang ulo sa drayber og motorsiklo ug mituasik ang iyang utok dihang ang gimaneho niya nga motor nabangga ngadto sa pampasahero nga jeep samtang kusog nga nagdagan didto sa Barangay Talavera, dakbayan sa Toledo kaniadtong Biyernes sa buntag.
Ang namatay mao si Mariano Monteroso, 51, nga taga Barangay Arpili, Balamban samtang ang iyang angkas nga si Cirilo Barcuma, 46, nakaangkon usab ug mga pangus sa kalawasan ug gidala sa ospital dinhi sa dakbayan sa Sugbo.
Matud sa mga saksi nga wala magsul-ob og crash helmet ang mga biktima nga paingon unta sa Balamban dihang ang gisakyan nila nga motorsiklo midasmag sa PUJ nga gimaneho ni Ildefonso Diosma, 33, taga Barangay Matab-ang, dakbayan sa Toledo.
Ang drayber sa PUJ gikataho nga gitanggong sa kapolisan sa dakbayan sa Toledo samtang nagpaabot kun moreklamo ba ang kabanayan sa namatay.
Sa laing bahin, naangol ang usa ka 72-anyos nga si Escarpe Villasan, byuda, nga molupyo sa Poblacion, Barili human kini mabanggai og motorsiklo paglabang niya sa karsada. Ang drayber sa motorsiklo mao si Ma. Soraya Joven, 29, nga taga Barangay Giloctog, Barili. (BANAT NEWS)