CEBU, Philippines - Naangol ang usa ka tawo diha sa IPM Construction Site sa sitio Huyong-huyong, barangay Tawason, dakbayan sa Mandaue human maigo sa bala sa pusil nga giduwaan sa usa ka lalaki niadtong Martes sa hapon .
Nalungag ang luyong bahin sa tiil, paa ug bukton ni Therson Tawason, 33, residente sa dapit human aksidenteng naigo sa bala sa pusil nga giingong giduwaan ni Mario Velasco, Jr., taga Hill Top sa nahisgutang barangay.
Si Senior Inspector Romel Luga, hepe sa kapolisan sa Presinto 6 sa Mandaue City Police Office (MCPO) miingon nga si Velasco nagduwa sa kalibre .45 nga pistola pinaagi sa pagpatuyok niini apan kalit kining mibuto ug naigo ang biktima nga nagbarog sa atbang nga bahin. Sa kahadlok sa suspetsado dali kining misibat palayo sa lugar samtang ang biktima gidala ngadto sa North General Hospital sa Talamban, dakbayan sa Sugbo.
Ang suspetsado mitahan sa armas nga iyang gidulaan nga dunay serial number nga 803048 ug dunay upat ka buhing bala ug usa ka kabhang ngadto sa guard on duty nga si Edgar Luaña Baluarte kinsa maoy mitugyan niini ngadto sa kapolisan. (BANAT NEWS)