CEBU, Philippines - Gitambagan ni Police Regional Office (PRO)-7 direktor Danilo Constantino ang hepe sa kapolisan dinhi sa dakbayan sa Sugbo nga ayuhon pag-ayo ang paghimo’g presentasyon kabahin sa Performance Governance System.
Tambag ni Constantino ngadto ni Senior Supt. Noli Romana nga mas labing maayo kun mo-coordinate siya ni Senior Supt. Rey Lyndon Lawas, ang hepe sa kapolisan sa Lapu-Lapu, sa dili pa kini moadto sa Manila.
Matud ni Constantino nga dili siya makatugot nga mahagbong si Romana sa iyang presentasyon tungod kay ang PRO7 nakadawat man og Golden Eagle Award gikan sa Campo Crame ug ang Lapu-Lapu nakadawat ‘sab og Silver Eagle Award.
Gitataw ni Constantino nga sa higayon nga mahagbong sa makaduha ka higayon ang usa ka hepe sa kapolisan, adunay posibilidad nga marelibohan kini sa iyang pwesto.
Sumala pa ni Constantino nga iyang natimbang-timbang nga ang gihan-ay nga presentasyon ni Romana aduna pa’y angayang usbonon ug maayo nga panindoton.
Mipasabot si Constantino nga ang matag city police office adunay gitawag og “dashboard†nga adto malatid ang tanan nilang target accomplishment ug ang gikinahanglang salapi nga gamiton sa paghimo sa maong gimbuhaton.
Pinaagi sa maayong paghimo og presentasyon adto hukman kun mapatuman ba sa usa ka hepe sa kapolisan ang iyang proyekto nga buot himoon ug kun makab-ot ba niya ang iyang target.
Naobserbahan ni Constantino nga sa dakbayan sa Sugbo ang community programs sa CPPO ubos ra kaayo ang iyang gitakda nga target.
Naglaum ang direktor sa PRO-7 nga mahan-ay pag-ayo ni Romana ang iyang presentasyon didto sa Crame aron makakuha kini og dako nga rating. (/RUB) (BANAT NEWS)