Mayor nagduda nga dunay polis Talisay adik

CEBU, Philippines - Nagduda si Mayor Johnny De los Reyes nga adunay mga polis sa dakbayan sa Talisay nga tiggamitan og gidili nga drugas mao nga gusto niya’ng mahimoan sila og random drug test.

Ang mayor mibutyag nga adunay mga kagamitan sa paghingos og shabu nga napalgan sa daan nga Innova police patrol car.

Sa press conference kagahapon sa buntag, ang mayor miingon nga ang pagkakaplag sa mga drug-sniffing paraphernalia sama sa aluminum foil sulod sa sakyanan sa kapolisan nga gipaayo sa motor pool basihanan nga dunay pipila kanila nga drug user.

Matud ni Delos Reyes nga dili siya gusto nga adunay polis sa Talisay nga adik sa gidili nga drugas.

Si Talisay City police chief Resty Santos nagkanayon nga sa paglingkod niya pagka hepe sa Talisay City Police Station nasulod na sa motor pool ang maong sakyanan.

Matud ni Santos nga wala siya pahibaw-a sa mayor nga dunay mga drug-sniffing paraphernalia nga nakit-an sa patrol car aron unta makapahigayon siya og imbestigasyon.

Nagduda hinoon si Santos nga posibleng mga ebidensiya ang maong mga paraphernalia gikan sa mga drug personality nga nasikop.

Uyon si Santos nga himoan og random drug test ang mga polis. Sa laing bahin, si Mayor JVR miingon nga pailisan g’yud niya si Santos sa katungdanan tungod sa giingong pagkapakyas niini sa iyang saad nga modakop og tulo ka mga drug personality matag semana. Apan si Santos miingon nga natuman niya ang iyang saad ug gawas sa problema sa drugas gitutokan usab nila ang mga insidente sa tulis ug kawat sa Talisay. (Brenda D. Batuto/RUB)

LTFRB maghimo’g public hearing

Ang Land Transportation Franchising and Regulatory Board (LTFRB)-7 mopahigayon og public hearing aron sa pagpaminaw kun angay ba nga uyonan ang gidemanda nga usbaw sa pletehan sa mga pasahero sa PUJ’s. Si LTFRB-7 Regional Director Ahmed Cuizon miingon nga nagpaabot sila sa kamandoan gikan sa Manila kun kanus-a sila mopahigayon og public hearing sa petisyon sa Cebu Integrated Transport Service Cooperative (CITRASCO).

Ang CITRASCO gusto nga ang minimum nga pletehan sa mga PUJ’s himoon na nga P10. Ang mga sumasakay hinoon nakapanglingo-lingo sa kabalaka nga maaprobahan ang gidemanda nga usbaw.

Matud ni Cuizon nga giingnan siya ni LTFRB Chairman Winston Ginez nga adunay ipahigayon nga public hearing sa mga dapit nga may gidusong petisyon alang sa usbaw sa pletehan.

Gitataw ni Cuizon nga wala siya’y pagsupak kun ang public hearing anha lang gihapon ipahigayon sa social hall sa Cebu Normal University (CNU).

Si Cuizon miingon nga nindot ang mao nga lugar kay sayon lang alang sa mga tinun-an kun gusto sila nga motambong sa public hearing kay maglambigit man usab kini kanila nga sumasakay og jeepney.

Giawhag g’yud ni Cuizon ang katawhan nga motambong unya sa public hearing aron mapaminaw ang ilang baruganan.

Ang mga opisyal sa CITRASCO miingon nga ang pagsaka sa prisyo sa mga piyesa sa sakyanan maoy nag-unang hinungdan sa ilang pag-petisyon og dugang usbaw sa pletehan.   (BANAT NEWS)