Gi-padlock ni Mayor JVR ang opisina sa TCC acting president

CEBU, Philippines - Ang acting president sa Talisay City College (TCC) Richel Bacaltos mopasaka og kaso batok ni Mayor Johnny De los Reyes tungod kay gisirad-an ang iyang opisina kaniadtong Miyerkules sa gabii.

Apil nga gipasirad-an ni Mayor JVR mao ang opisina sa school registrar ug ang pag-padlock gihimo niadtong Miyerkules sa gabii.

Si Bacaltos nagkanayon nga ang gihimo sa mayor maisip nga illegal kay ang hukmanan wala pa makaresolbar sa gipasaka nila nga kaso kabahin sa paghulip kaniya sa katungdanan nga walay pagtugot sa Board of Trustees (BOT).

Ang pagsirado sa opisina ni Bacaltos ug sa school registrar gipa-blotter nila sa kapolisan aron basihan unya sa pagpasaka og kaso sa hukmanan.

Matud ni Bacaltos nga ang maong pag-padlock sa ilang buhatan sa TCC maisip kini og “sedition” tungod kay mahunong man ang operasyon paghatag og serbisyo sa gobiyerno ngadto sa katawhan.

Dugang ni Bacaltos nga iyang gihan-ay karon ang mga dokumento alang sa laing kaso nga iyang gipasaka batok sa mayor.

Si Loulette Zafra, acting school registrar, nagkanayon nga nakugang na lang sila dihang gialihan na og plywood ang pultahan sa ilang opisina.

Dunay mga tinun-an nga mokuha unta og transcript of records (TOR) nga nabawo kay gi-padlock man ang registrar’s office.

Matud ni Zafra   nga wala motuman sa balaod ang mayor nga papirmahon sila og kontrata nga kutob lang sila sa buwan sa Pebrero aron usab sila makakuha sa ilang sweldo.

Si Zafra contractual nga kawani sa TCC ug staff ni Bacaltos sulod na sa walo ka tuig. Kaniadtong Oktubre gipalingkod siya nga school registrar.

Ang argumento nila ni Bacaltos ug Zafra nga kay ang BOT man maoy mitudlo kanila sa katungdanan ang BOT usab ang angay’ng mopahulip kanila.

Giangkon sa mayor nga siya ang nagpasirado sa opisina nila ni Bacaltos ug Zafra kay duol na ang graduation ug wala gihapon mopahawa si Bacaltos sa pwesto.

Matud sa mayor nga ang mga non-teaching staff nagbuot-buot lang usab sa ilang kontrata nga wala moagi ngadto kaniya hinungdan nga dili kini magahinan og sweldo tungod kay wala man siya makapirma.

Si Mayor JVR miingon nga kun ang mga non-teaching personnel gusto nga mobalik pagtrabaho kinahanglang mo-apply sila pag-usab.

Matud sa mayor nga dili siya malisang kun ikiha kay gibasura na sa hukmanan ang gipangayo   ni Bacaltos nga Temporary Restraining Order (TRO) ug injunction aron pugngan siya paghulip kaniya.

Ang city legal officer miingon nga kun modaog si Bacaltos sa iyang gipasakang kaso makabalik siya sa katungdanan.

Dugang ni Sipalay nga temporaryo lang ang pagsirado sa registrar’s office ug buksan kini sa daling panahon aron mabalik na ang serbisyo sa maong buhatan. (Brenda D. Batuto/RUB)

Opisyal sa kapolisan gihadlok og bitin

Usa ka opisyal sa Police Regional Office (PRO)-7 gihadlok sa dako’ng bitin nga mibalikis sa ganghaan sa iyang balay didto sa Barangay Mabolo kagahapon sa kaadlawon.

Si Superintendent Audie Villacin, hepe sa Police Community Relations (PCR), nakugang pag-ayo dihang gipatingog sa iyang mga silingan ang buzzer sa ganghaan sa iyang balay.

Matud ni Villacin nga nagkaguliyang ang iyang mga silingan human makit-i ang bitin nga may duha ka dupa ang gitas-on ug mora’g bukton sa tawo ang gidak-on nga nagbalikis sa gate sa balay sa opisyal.

Si Villacin dali nga nangayo’g tabang sa kapolisan sa Mabolo aron madakpan ang bitin sa kahadlok nga tingali’g mosulod kini sa iyang balay.

Walay bisan usa sa mga miresponde nga polis gikan sa Mabolo nga nagpatuga-tuga pagdakop sa bitin sa kahadlok nga sila mapaakan.

Matud ni Villacin nga ang kapolisan napugos pagpatay sa bitin pinaagi sa pagbunal og kahoy, samtang dunay uban nga migamit og kabilya.

Nagtoo si Villacin nga ang mao nga bitin gikan kini sa luyo’ng bahin sa ilang balay nga adunay gisugdan pagtukod nga balay.   (BANAT NEWS)