CEBU, Philippines - Siyam ka videokehan ang sunodsunod nga gipatak-opan ni Lapu-Lapu City Mayor Paz Radaza sa ilawom nga bahin sa Marcelo Fernan Bridge sa Pusok, dakbayan sa Lapu-Lapu.
Matud pa ni Antonio Otrera sa task force nga nag-monitor sa mga videokehan, siyam na ka videokehan ang ilang gipasirado gumikan sa reklamo sa mga residente kay saba kaayo bisan dis-oras na sa gabii. Matud pa ni Radaza base sa ordinansa sa dakbayan sa Lapu-Lapu kinahanglan nga sound proof ang mga videokehan aron dili kini makadisturbo sa uban ilabi na kung lapas na sa alas 10:00 sa gabii.
Nasuta usab sa task force nga walay mga business permits ang ubang videokehan. Matud pa ni Otrera, padayon ang ilang operasyon sa mga videokehan nga nakalapas sa ordinansa ug wala motuman sa oras nga sila mag-operate sa ilang mga videokehan.
Hinoon pwede pa mahatagan og higayon ang mga tag-iya sa mga videokehan nga maka-operate kung tumanon niini ang mga lagda sa paglikay nga dili makadisturbo sa mga residente ilabi na kung ang lugar usa ka residential area. (BANAT NEWS)