CEBU, Philippines - Gipatak-upan ni Lapu-Lapu City Mayor Paz Radaza ang atabay nga gidudahan nga nagpahigayon og treasure hunting sa Sitio Kambiohan, Marigondon dakbayan sa Lapu-Lapu. Matud pa ni Radaza bisan pa kung usa ka pribadong luna ang gikalot aron mohimo og atabay nagkinahanglan gihapon kini og permiso gikan sa lokal nga kagamhanan.
Kinahanglan ang usa ka "excavation permit", DENR permit ug permit gikan sa National Historical Commission kung ugaling treasure hunting ang katuyoan sa maong pagkalot.
Apan gipasabot ni Radaza nga bisan niduol pa kini kanila, dili gihapon siya mohatag og permit kay dugay nang panahon nga wala na moluwat og ingon niini nga permit ang siyudad.
Gi-monitor sa siyudad ang pagbutang og atabay tungod sa kabalaka nga makaapektar kini sa volume sa tubig sa ilawom sa maong isla hinungdan nga ilang gisuspenso ang pagpangluwat og permit kalabot niini.
Gumikan niini iyang gimanduan ang kapolisan sa pagbutang og pulis nga 24- oras nga mag-monitor sa maong dapit aron dili na magpadayon ang maong pagpakalot sa yuta.
Kahinumduman nga nadiskobrehan sa Task Force Kalikasan ang usa ka atabay sa Marigondon sa yuta ni Angelina Soriano. Gidudahang illegal treasure hunting ang gikalot sa mga sakop ni Johnny Mallo uban sa mga trabahante gikan sa General Santos City.
Apan si Mallo mipanghimakak niini kay matud pa atabay ra gyud ang ilang gihimo. (BANAT NEWS)