CEBU, Philippines - Nasuko ang mga opisyal sa Cebu City Hall kay ang court sheriff mipa-demolis sa kabalayan sa mga informal settlers sa dalan J. De Veyra, North Reclamation Area (NRA) apan ang mga ginuba anaa ra gipangtapok sa karsada.
Matud ni City Administrator Lucelle Mercado nga ang daghang kagamitan sa gipangguba nga panimalay nga anaa ra sa karsada gibutang nakabalda kini sa pag-agi sa mga sakyanan. Si Atty. Collin Rosell, hepe sa Division for the Welfare of the Urban Poor (DWUP), mihimo og personal nga pakisusi didto sa maong lugar ug nakita g’yud niya nga anaa ra sa karsada gitam-ok ang mga ginuba.
Mga motorista nga miagi didto sa dalan J. De Veyra kagahapon nagbagulbol kay nabalda ang ilang biyahe tungod sa mga ginuba nga anaa sa karsada gipangbutang.
Ang City Legal Office nga gipangulohan ni Jerone Castillo gimandoan na nga mohimo og lakang aron awhagon ang hukmanan nga ihunong ang demolisyon hangtod nga makakita og paagi ang court sheriff nga dili anha sa karsada ibutang ang mga ginuba.
Giingnan ni Rosell ang court sheriff nga ang mga ginuba adto lang ibutang sa dapit nga gigub-an sa balay aron dili makasamok sa pag-agi sa mga sakyanan. (BANAT NEWS)