CEBU, Philippines - Kun ang Department of Health maoy pasultihon maisip nga ‘mild outbreak’ ang pagkuyanap sa sakit nga tipos sa lungsod sa Tuburan.
Si Central Visayas Regional Director Dr. Jaime Bernadas mibase niini sa report sa Regional Epidemiology and Diseases Surveillance Unit (RESU) sa barangay Monte Alegre.
"Duna na ni syay gitawag nga minor outbreak didto sa maong Sitio (Birhern sa Regla). Kinahanglan ning matutukan. Thus, atong gipabalik didto ang atong team. Aron matutukan gyud maayo ang sitwasyon. Ang ato man gud didto ang water system dili kaayo developed," matud ni Bernadas.
Apan iyang gipasabot nga dili angay'ng mabalaka ang katawhan tungod kay kini giatiman na sa mga awtoridad ug gipangitaa’g permanenteng solusyon.
"Dili lang ta angay nga mabalaka kay isolated cases sa usa ka area man ni. Ang importante, ato nga na-improve ang situation, nagsugod na tag treat ug na-educate nato ang lumulupyo unsa ka importante ang ensakto ug limpyo nga intake and discharge," dugang ni Bernadas.
Gisaad ni Bernadas nga iyang irekomendar nga pahatagan sa financial assistance ang Tuburan alang sa mas luwas nga water facilities.
Sa pakisusi sa RESU, 39 ka kaso sa tipos ang ilang na- record gikan sa Pebrero 28 ngadto sa Marso 7 sa Sitio Birhen sa Regla, barangay Monte Alegre, Tuburan, Cebu diin 19 ang na-admit sa Tuburan District Hospital samtang laing 20 ang nagpakonsulta sa Rural Health Unit (RHU) kon health center apan wala ma-admit.
Kasagaran sa mga nataptan nag edad og 10 ngadto sa 20 anyos nga miabot sa 40 porsiyento diin nakabati sa paghilanat, labad sa ulo, pagkalibanga. (BANAT NEWS)