CEBU, Philippines - Usa ka lalaki ang gitigbas sa silingang iyang gibadlong nga dili magsige og rebulosyon sa iyang motor pasado alas 8:00 sa miaging buntag sa sitio Lourdes, barangay Cogon-Pardo sa dakbayan sa Sugbo.
Ang naangol naila nga si Gaspar Amores, 43, molupyo sa samang lugar samtang ang mitigbas kaniya naila nga si Allen Gasalatan, 30, nga silingan ra sa biktima.
Ang biktima kuyog sa anak sa iyang amo nanglakaw sa dalan ug samtang ang suspek didto sa kilid nga nag-ayo sa iyang motor. Matud pa gibadlong kini sa biktima kay aso kaayo ug magkatapuling ang bata apan nasuko ang suspek. Sa pagbalik sa biktima gitigbas kini sa suspek apan nasagang kini ni Amores sa bukton nga maoy natabas, usban pa unta kini pagtigbas sa suspek apan napugngan na kini sa mga tawo.
Gidala ang biktima sa Cebu City Medical Center sa mirespondeng polis samtang gipangita pa ang suspek.
Nakamata na lang ang usa ka Joemar Lumapguid, 22, tungod sa paduslak-duslak kaniya sa silingang si Michael Labasan, 24, diha sa barangay Basak-San Nicholas pasado alas 4:00 sa miaging hapon.
Nakaangkon og daghang samad sa iyang lawas ang biktima nga daling gidala sakay sa usa ka taxi padulong sa CCMC samtang nadakpan ang suspek sa mga barangay tanod. Ang kapolisan padayon pang nag-imbestigar sa maong hitabo. (/EIM)(BANAT NEWS)