Tulisan nga mag-motor mibalik na ‘sab sa Mandaue

CEBU, Philippines - Mibalik na usab pag-operate kining mga tulisan nga magsakay og motorsiklo ug manulis sa mga biktima nga ilang maagian diha sa karsada. Duha ka maghigugmaay nga sila si Lisando Misa, 21, lumad nga taga lungsod sa Bantayan, ug si Jhulia Auxtero, 20, taga Barangay Jagobiao, Mandaue maoy bag-ong biktima sa mga tulisan.

Ang duha nagbarug daplin sa national highway sa Barangay Jagobiao, Mandaue mga ala-una sa kaadlawon kagahapon samtang nagpaabot og bus nga ilang masakyan paingon sa Hagnaya, San Remigio.

Matud ni SPO2 Danilo Barrita, sakop sa Presinto 3 sa Mandaue City Office (MCPO), nga ang duha ka wala hiilhing tulisan nagsakay og pula nga motorsiklo ug pulos nagsul-ob og close type helmet. Gibana-bana sa mga biktima nga ang mga tulisan  mga 20 ang panuigon.

Ang mga biktima muadto unta sa Bantayan mao nga nangadlawon sila pag-atang og bus nga ilang masakyan.

Paghunong sa nagmotor nga mga tulisan mition dayon kini’g armas ug gipakuha ang mahalong butang sa mga biktima.

Ang maghigugmaay nakuhaan og upat ka cellphone, P5,000 nga salapi ug shoulder bag nga gisudlan sa dalaga sa iyang kagamitan sa pagpa-gwapa.

Human makuha sa mga tulisan ang mahalong butang ug kwarta sa mga biktima mipasirit sila’g padagan sa motor paingon sa Consolacion. (Romeo T.  Limpangog/RUB)

Upos sigarilyo dili ipataka’g labay

Ang kabomberohan sa dakbayan sa Lapu-Lapu miawhag sa mga tawo nga kusog manigarilyo nga dili ipataka’g labay ang ilang mga nagbaga pa nga mga upos aron dili makamugna og sunog.

Usa kini sa rason nga daghan kaayo’ng sunog sa mga sagbot atol niining panahon nga grabe kaayo ang kainit kay dali ra maduktan ang mga basura apil ang kabalayan nga hinimo lang sa yano nga mga dapat.

Matud ni Lapu-Lapu City Fire Marshal Oscar Mayol nga upat na ka “grassfires” ang ilang narespondehan sukad niadtong Marso 1 hangtod kagahapon. Ang katapusang grassfire nahitabo didto sa Barangay Pusok, dakbayan sa Lapu-Lapu.

Tungod sa kainit karong panahona dali ra modukot ug moulbo ang sunog dili lang sa mga sagbot kun dili lakip na sa mga balay nga gigama lang sa mga kahoy.

Awhag ni Mayol sa katawhan nga likayan ang pagdaub duol sa kasagbutan ug kadtong mahiligong manigarilyo ilabay ang ilang upos adto sa dapit nga wala’y mga sagbot.  (/RUB) (BANAT NEWS)