CEBU, Philippines - Uyon ang hepe sa PNP Crime Laboratory Service (CLS)-7 nga ang tanang M16 Armalite rifles sa kapolisan ug militar ingon man ang gipanag-iya sa mga sibilyan himoan og ballistic test dayon i-cross-matching basin makatabang pagsulbad sa pagpatay ni Atty. Noel Archival. Si Dr. Nestor Sator wala hinoon makahatag og bana-bana kun unsa kadugay ang paghuman sa mao nga ballistic test ug cross-matching sa libo-libo ka M16 rifles nga ania sa rehiyon. Ang kapolisan nga miresponde sa dapit nga nahitaboan sa pagbanhig ni Archival didto sa Barangay Coro, Dalaguete nakakaplag og mga kabhang sa M16 rifles didto sa karsada nga maoy gigamit sa mga namanhig. Sila si Archival ug tulo ka kauban luwan sa Ford Escape sa abogado dihang sila gibanhigan ug tulo kanila ang namatay. Ang ballistic test nagpasabot nga pabuthon ang armas unya ang slug nga mogawas gikan sa sumbohan itandi sa mga slug nga nakit-an gikan sa lawas sa biktima o kaha sa dapit nahitaboan.
Pinaagi sa kabhang mailhan usab kun susama ba nga armas ang gigamit pinaagi sa lubyok nga igo sa “firing pin†ug sa agi sa “ejector†sa bala.
Ang regional director sa PNP Criminal Investigation and Detection Group (CIDG)-7 nga si Senior Superintendent Ritchie Posadas miuyon usab sa sugyot nga i-ballistic test ang mga armas sa kapolisan ug militar aron mahanaw ang pagduda nga nalambigit sila sa krimen. - /RUB (BANAT NEWS)