Dinakpan sa Talisay giawhag nga pabuhian

CEBU, Philippines - Usa ka tawo nga nagpaila nga opisyal sa lungsod sa Socorro, Surigao del Norte mihangyo nga buhian ang unom ka molupyo sa ilang dapit nga nadakpan sa Talisay pagpayuhot og mga ginabas nga kahoy nga walay permit.

Si Talisay City Administrator John Yre De Los Reyes miingon nga dunay mitawag kaniya nga nagpaila nga bise mayor sa Socorro nga mihangyo nga dili lang ikiha ang mga dinakpan.

Duna ‘say mi-text sa selpon sa city administrator gikan sa tawo nga nagpaila na usab nga mayor ug susama ra gihapon ang katuyoan.

Gusto nila nga pabuhian sila si Danilo Lampad, kapitan sa bangka ug ang mga tripulante niining sila si Nesan Lampad, Felix Lampad, Ronil Balbareno, Junior Gelsano ug Rolando Angcob.

Sila nadakpan sa mga sakop sa Special Warfare Group (SWAG) sa Philippine Navy ug gitugyan ngadto sa Fishermen Sea and Ecological Care (FISECA) niadtong Miyerkules sa gabii.

Ang unom wala nila gitanggong sa bilanggoan  ug anaa ra sila sa headquarters sa FISECA ug gisukit-sukit aron mahibaw-an kun kinsa ang mopalit sa mga lumber nga ilang gidala.

Walay napakitang dukomento sa mga kahoy nga ilang gikarga ang mga suspetsado. Nahibaw-an pa g’yud base sa pamahayag sa usa sa mga tripulante sa bangka nga mamalit diay unta sila og ammonium nitrate sa Talisay.

Ang ammonium nitrate usa kini sa sangkap sa paghimo og eksplosibo. Laing tripulante sa bangka miingon nga mamalit sila og mga hugaw sa hayop aron himuong abuno ug matud ni De los Reyes wala magkatukma ang mga rason sa mga dinakpan.

Ang FISECA miduso na sa maong kaso ngadto sa Department of Environment and Natural Resources (DENR) aron ang maong ahensiya na ang mopahigayon og dugang imbestigasyon.   (BANAT NEWS)