DOE, DOLE moinspeksyon sa nahugno nga minahan

CEBU, Philippines - Ang Department of Energy (DOE-7) misuspenso sa operasyon sa  minahan sa SKI Energy Resources Inc. (SERI) Mining Corporation sa barangay Dunga syudad sa Danao human kini nihulpa niadtong adlaw nga Sabado diin usa ka minero ang patay ug tulo ang angol. Ang DOE-7 nipadala na og mga imbestigador nga gipangulohan ni Ed Amante aron pagsusi sa hinungdan sa pagkalusno sa maong minahan.

Tungod sa suspension, walay bisan kinsa nga gitugutan nga makasulod sa naasoy nga minahan.

Si Amante makig-estorya sa 13 ka mga minero nga naluwas sa maong trahedya aron pagsuta sa tinuoray nga hitabo sa wala pa nahugno ang maong minahan nga gibana-banang 400 metros gikan sa baba ang gilawmon.

Giangkon hinuon niini nga ang maong minahan dunay permiso sa DOE ug rehistrado kini.

Samtang gibalikan sa pagbisita sa Department of Labor and Employment (DOLE-7) ang maong minahan human gibabagan sa pagsulod sa maong kompanya ang grupo sa mga labor inspectors niadtong nakalabay nga adlaw.

Sigon sa tigpamaba sa DOLE-7 Emmanuel Ferrer usa ka team sa inspectors nga gipangulohan ni Greg Diaz ang gipadala  aron pagsusi kun gituman ba ang safety measures sa kompanya.

Buot sutaon sa labor inspectors kun wala bay kalapasan sa katungod sa mga mamumuo ug kung gipatuman ba sa minahan ang saktong suhulan sa ilang mga minero.

Una niini, si Danao City Mayor Ramon "Nito" Durano mibutyag nga pakyaw-pakyaw system ang pagsuhol sa naasoy nga mga minero aron daling mahuman ang trabaho.

Ang DOLE mibahad nga ilang pahamtangan sa tukmang silot ang maong minahan kun mamatud-ang nakalapas sa Labor Code of the Philippines. (/EIM)(BANAT NEWS)