Duha ka puya gipanglabay

CEBU, Philippines - Duha ka patay’ng puya napalgan nga gipanglabay lang sa managlahi nga dapit sa dakbayan sa Talisay ug Lapu-Lapu.

Ang usa ka puya napalgan didto sa kasagbotan nga bahin sa Barangay Candulawan, Talisay ug ang laing puya didto ‘sab mapalgi sa Sitio Purok-Nangka, Barangay Gun-ob, Lapu-Lapu.

Gitoohan sa kapolisan nga ang mao nga mga puya gipugos pagpakuha gikan sa tago-angkan sa ilang mga inahan ug gipanglabay lang sa mao nga dapit.

Nasayran ‘sab sa kapolisan nga pulos mga babaye ang mao nga puya nga wala pakatawha sa ilang inahan.

Si PO1 Anthony Piencenaves sa homicide section sa Lapu-Lapu City Police Office miingon nga ang puya nga gilabay didto sa Gun-ob una nga nakit-an sa usa ka Ricky Berdin, 41.

Gani si Berdin maoy nagpahibalo niini ngadto sa kapolisan nga ang puya napalgan giitsa lang sa kanal nga wala gani pusta og panapton.

Giawhag sa kapolisan ang mga lumolupyo sa maong dapit pagsuta kun kinsa ang mga babayeng nagsabak sa ilang dapit ug kalit lang migamay ang tiyan bisan wala makapanganak.

Susama usab niini ang awhag sa kapolisan didto sa mga lumolupyo sa Barangay Candulawan, Talisay.  (BANAT NEWS)

Show comments