Labor group mopetisyon og usbaw sa suholan

CEBU, Philippines - Nagtinguha karon ang labor group dinhi sa Sugbo nga mosang-at og laing petisyon alang sa usbaw sa suhulan sa mga mamumuo dinhi sa Central Visayas.

Kini bisan pa man og bag-ohay lamang napirmahang wage order nga nagtugot sa P13.00 nga Cost of Living Allowance (COLA).

Suma pa ni Atty. Ernesto Carreon sa Association of Labor Union-Trade Union Congress of the Philippines (ALU-TUCP) nga usbaw sa suhulan ang gipangayo karon sa mga empleyado dinhi sa Sugbo ug dili ang P13.00 nga COLA nga maoy giaprobahan sa mayoriya sa RTWB-7.

Gitug-an ni Carreon nga naglaraw unta sila nga moapelar ngadto sa National Wage and Productivity Commission apan ilang gitimbangtimbang nga mas palabihon nila ang pagduso og laing petisyon.

Matud pa ni Carreon way sukaranan ang rason sa business  sector pagbabag sa wage increase nga dili maayo ang ekonomiya sa Visayas tungod sa pag-igo sa linog ug bagyo niadtong miaging tuig.

Gihimong basehan ni Carreon ang impormasyon gikan sa Director General ug Social Economic Planning Secretary sa National Economic Development  Authority (NEDA) nga si Arsenio Balisacan nga nag-ingong himsog ang ekonomiya sa Kabisay-an bisan sa pag-igo sa mga kalamidad.  ang sektor sa mga negosyante dinhi sa Sugbo miinsister nga naglisod ang ekonomiya sa Visayas tungod sa mga kalamidad sa niaging tuig hinungdan nga wala kini motugot sa gipangayong usbaw sa suhulan ning tuiga.(/EIM)(BANAT NEWS)