CEBU, Philippines - Pagbisita ni Presidente Benigno Aquino III sa umaabot nga selebrasyon sa EDSA People Power Revolution karong adlaw nga Lunes gipangandaman og maayo sa kapolisan ug sa militar.
Ang hepe sa Cebu City Police Office nga si Sr. Supt. Noli Romana nagkanayon nga naandam na nila ang general security plans sa maong adlaw, apan ilaha pang gipaabot ang Presidential Security Group kalabot sa kinatibuk-ang preparasyon.
Sama sa naandan sa panahon nga moduaw ang usa sa pangulo sa nasud sa mga lugar, ibutang dayon sa heightened alert status ang kapolisan.
Nagtuo usab si Romana nga dili kaayo mohimo og kagubot ang mga cause-oriented groups sa maong adlaw tungod kay base sa naobserbahan sa hepe, dili mga samok ang mga Sugbuanon.
“The Cebuano people never cease to surprise me, they are peace loving people and they have one voice,†sumala pa ni Romana.
Samtang si Supt. Renato Malazarte, operations and plans division sa Cebu Provincial Police Office miingon duna na say giandam nga kapolisan ngadto sa amihanang bahin sa Sugbu nga bisitahon ni Aquino.
Si Aquino moduaw sa mga nabiktima sa bagyong Yolanda sa maong dapit aron pagtan-aw sa kalamboan sa rehabilitation efforts sa gobiyerno sa maong dapit.
Samtang ang Central Command mopakatap usab og 800 ka mga sundalo alang sa seguridad sa presidente atol sa pagduaw niini dinhi sa Sugbu. (/EIM)(BANAT NEWS)