CEBU, Philippines - Ang mga traffic enforcers dinhi sa dakbayan sa Sugbo gimandoan nga pangsakmiton ang mga roller blades nga gigamit sa kabataan nga anha magduwa sa karsada nga agianan sa daghang sakyanan.
Matud ni Joy Tumulak, operations chief sa City Traffic Operations Management (CITOM), nga ang pagduwa og roller blades diha sa karsada makarisgo sa kinabuhi sa kabataan.
Giangkon ni Tumulak nga nadani ang ilang atensyon tungod sa hulagway nga gipublikar sa Banat News sa miaging semana nga nagpakita sa bata nga nag-roller blade taliwala sa daghang mga sakyanan.
Gitataw ni Tumulak nga ang tag-iya sa mga masakmit nga roller blades pabayron og multa nga P500, ug kun lapas na sa 18 ang pangedaron sa masakpan pasakaan pa gayud sila og kaso.
Si Tumulak miingon nga bisan sa Republic Act 4136 kon Transportation and Traffic Code, ug ang ordinansa sa dakbayan gidili ang pagpaguyod sa mga PUJ’s niadtong magsakay og roller blades. (BANAT NEWS)