CEBU, Philippines - Usa ka lalaking naghupo-hupo duol sa balay sa usa ka polis sa Sitio Calumpang, Barangay Poblacion West, Moalboal napusilan patay kagahapon sa kaadlawon.
Si PO1 Sofialin Pableo, bag-uhay lang nauli gikan sa Dumanjug Police Station diin siya madestino dihang gipahibalo sa iyang mga silingan mahitungod ni Delgado Sab-a, 31, taga-Barangay Poblacion East, nga nakit-ang naghupo-hupo sa ilang dapit.
Miresponde si Pableo apan sa dihang iyang gisita si Sab-a miaksyon kini og bunot og armas sa iyang kilid apan naunhan ni Pableo.
Daling gidala si Sab-a sa Badian District Hospital apan gideklarar kini nga dead on arrival.
Si Insp. Edgar Labe, hepe sa Moalboal Police Station, mibutyag nga kadudahan ang lihok ni Sab-a sa dihang gisita kini ni Pableo apan inay magtarong og estorya mi-aksyon hinuon kini og bunot og armas.
"Mura kuno og dunay gibunot kay kabantay man kuno siya nga mura og may armas nga giluklok sa kilid," matud ni Labe.
Sumala pa nga sa wala pa gisita ni Pableo ang suspek nangayo kining daan og backup sa police station bahin sa maong tawo. Giklaro hinuon ni Labe nga walay pinusilay nga nahitabo.
Nakuha sa Moalboal police gikan ni Sab-a ang usa ka .38 revolver nga adunay duha ka bala.
Boluntaryong mitahan sa iyang kaugalingon si Pableo ngadto sa kapulisan ug gitugyan ang iyang .9mm service pistol.
Matud ni Labe nga si Cristy Velonta, 37, live-in partner ni Sab-a mitug-an nga pipila ka adlaw nang nausab ang linihokan sa iyang bana kay manghulga na kini kaniya nga sila iyang pamusilon.
Apan base sa records sa Moalboal Police Station walay record nga si Sab-a nalambigit og ilegal nga kalihukan.
Hinuon padayon pang giimbestigar sa kapulisan ang maong kaso samtang nagpaabot sa pamilya sa namatay kun mokiha sila sa maong polis. (BANAT NEWS)