CEBU, Philippines - Ang National Food Authority (NFA) miawhag sa mga mayor nga mohimo og koordinasyon sa ilang mga magbabalod aron magmugna og ordinansa nga ang mga kan-anan sa ilang lugar mohatag na og “half rice serving†sa ilang kustomer.
Si Nestor Rey Alcoseba, NFA provincial manager sa Sugbo, mipadala og suwat ni Mayor Michael Rama aron nga masugdan na pagpatuman dinhi sa dakbayan sa Sugbo ang pagdaginot og pagkaon.
Matud ni Alcoseba nga ang paghatag og half-rice serving kabahin kini sa programa ni Presidente Aquino nga pagdaginot og bugas aron daghan ang katawhan nga makakaon sa dili kaayo abunda nga bugas.
Gipasabot ni Alcoseba nga base sa pagtoon nga gihimo sa Food and Nutrition Research Institute (FNRI) mata’g usa ka Filipino makausik og duha ka kutsara nga luto na nga bugas-humay kada kaon.
Gibana-bana nga ang kantidad sa mausik lang nga pagkaon sa tibuok nasud moabot og P6.2 Bilyones mao nga giawhag ni Presidente Aquino ang katawhan nga dili usik-usikan ang pagkaon.
Gipasabot ni Alcoseba nga kinahanglan nga ang mga kan-anan mo-serve g’yud og katunga sa order kay aduna ma’y daghang mga tawo nga dili makahurot sa usa ka order nga rice. Dunay ubang kan-anan nga dili mohatag og half-rice serving mao nga mapugos ang uban nga biyaan lang ang dili mahurot og adto na lang ‘sab kini sa lamaw mahipunta. (BANAT NEWS)