CEBU, Philippines - Ang hepe sa Land Transportation Office (LTO) licensing division sa dakbayan sa Mandaue miawhag sa mga molukat og lisensya nga likayan g’yud nila ang mga “fixers†aron dili sila mabiktima sa mga binuang.
Ang gipasabot ni Fernando Bustillos mao ang mga fixers kunohay motabang sa mga gusto nga molukat og driver’s license ug ilang pangayoan og dakung kantidad apan ang ihatag mga peke nga lisensya sama niadtong pinabuhat ra sa usa ka ID shop sa dalan Colon.
Gironda sa kapolisan sa miaging Huwebes ang ID shop diha sa downtown Colon nga tighimo og mga peke nga driver’s license ug kakonsabo sa ubang mga fixer sa LTO diha sa Mandaue.
Usa ka Nigerian national nabiktima dihang nagtuo siya nga ang driver’s license nga gihatag kaniya sa fixer gikan gayud sa LTO apan pinabuhat ra diay sa ID shop sa dalan Colon.
Matud ni Bustillos nga giestrikto nila nga dili makasulod ang mga fixer sa LTO-Mandaue maoy hinungdan nga anaa lang sila magpunsisok sa gawas sa LTO compound aron mag-atang og mga molukat og lisensya.
Si Bustillos miingon nga dili kalikayan nga adunay mga tawo nga matintal sa pagtanyag sa mga fixer nga makuha dayon nila ang lisensya sa tumang kasayon kun anha kanila ipaagi.
Ang opisyal sa LTO-Mandaue miingon nga dili lisod ang pag-ila sa mga fixer nga mobiktima sa mga tawo nga mokuha og lisensiya kay mangayo man kini og dakong kantidad nga salapi isip bayad nga dili na magkinahanglan og daghang dukomento.
Matud ni Bustillos nga aron kalikayan nga mabiktima sa mga fixer nga nag-atang gawas sa mga opisina sa LTO adto lang gayud moduol sa mga kawani sa ilang opisina. - (BANAT NEWS)