CEBU, Philippines - Gitulis sa duha ka lalaking nagsakay og motor ang usa ka kolektor sa dakong tindahan sa barangay Gawi lungsod sa Oslob sa miaging hapon.
Ang biktima naila nga si Jeroven Hugo Sarcauga, 29, taga barangay Anajao, Argao. Base sa spot report nga nagsunod sa biktima ang duha ka nagmaskara nga lalaki.
Padung unta sa Boljoon ang biktima dihang gimandoan sa duha nga pahunongon dayong tion og armas ngadto kaniya.
Tungod sa kahadlok sa biktima mihunong kini ug ang usa mikanaog sa motor ug gikuha ang iyang nakolektang P20 mil, usa ka cellphone ug bag nga may sulod nga nagkalain-lain nga card loads nga nagkantidad og P5 mil ug simpack nga P370. Human niini daling miikyas ang mga tulisan padung sa dakbayan sa Sugbo ug igo nalang pagsumbong sa kapolisan ang biktima.
Samtang usa ka Eleuterio Amores, 27, call center agent nga taga Catbalogan, Samar ang gitulis sa duha ka armadong lalaking nagmotor sa dalan Star Apple sa barangay Umapad, dakbayan sa Mandaue sa miaging kaadlawon.
Si SPO2 Juan Calamba sakop sa Presinto 5 sa Mandaue City Police Office (MCPO) miingon nga nag-atang og traysikol ang biktima dihang gihunongan sa mga tulisan ug gitionag armas dayong deklarar og tulis.
Gikuha sa mga tulisan ang iyang bag nga gisudlan sa iyang kuwarta nga nagkantidad og P4,300 ug mahalon nga cellphone ug pagkahuman daling mipabulhot palayo. (BANAT NEWS)