CEBU, Philippines - Gidakop sa kapolisan ang usa ka lalaki nga gikatahapan nga maoy mitulis sa pipila ka pasahero sa passenger jeep nga nagpaingon sa Mandaue kaniadtong Sabado sa gabii.
Si Gener Rondina, 34, taga Sitio Laray, Barangay Carreta, dakbayan sa Sugbo positibo nga giila sa biktima sa tulis nga mao ang suspek dihang gipakita siya sa hulagway sa mga badlongon sa katilingban.
Ang 19-anyos nga si Marilyn Conde ug ang usa ka menor-de-edad nga biktima mitudlo sa hulagway ni Rondina nga maoy mitulis kanila dihang gipakita sila sa kapolisan sa rogues gallery. Ang duha ka biktima sa tulis mitug-an sa kapolisan nga tungod sa ilang kalisang dali sila nga mihatag sa ilang selpon ngadto sa tulisan kinsa miambak duol sa Doña Pepang Cemetery duol sa pinuy-anan sa suspek.
Ang alert team sa Waterfront Police Station miadto dayon sa balay sa suspek ug ila kini nga gidakop base sa pag-ila kaniya sa mga biktima sa tulis.
Sa laing bahin, usa ka drayber og motorsiklo nga gigamit isip “habal-habal†giilogan sa iyang motor sa tawo nga nagpatoo nga pasahero.
Base sa police report si Jessen Benlot, 28, nagpaabot og pasahero atubangan sa St. Vincent Ferrer Parish sa Barangay Calajoan dihang usa ka lalaki nga miduol ug nagpahatod sa South General Hospital. Dihang naabot na sila sa ospital may usa ka tawo pa nga gipasakay ang pasahero ni Benlot ug ang duha nagpahatod na usab ngadto sa barangay Calajoan. Apan pag-abot nila sa ngitngit nga dapit sa Calajoan si Benlot gitiunan og armas sa usa sa iyang mga pasahero hinungdan nga miambak si Benlot gikan sa motor.
Matud ni Benlot nga sa wala pa mosibat ang mga suspek dala ang iyang motor usa kanila ang mipusil kaniya ug naigo ang iyang wala nga kamot. (/RUB)(BANAT NEWS)