CEBU, Philippines - Gihatagan og unom ka bulan nga lugway ang nagkadaiyang establisamento sa dakbayan sa Mandaue aron mosumitir ngadto sa City Treasurer’s Office sa dakbayan sa Mandaue sa mga dokumento nga gikinahanglan nga naglakip sa Social Security System (SSS) PhilHealth ug Pag-ibig Fund. Ang maong mga dokumento maoy gikinahanglan aron makakuha sila og business permit niining tuiga.
Kadtong malangan sa pagkuha sa mga business permits di na pabayron og tag singko mil pesos nga multa tungod sa gihatag nga lugway. Niadto pa untang Enero 20, 2014 ang deadline sa renewal sa mga business permits.
Si Konsehal Emmarie Ouano-Dizon nga maoy nangamahan sa maong resolusyon miingon nga dili madali ang paglukat sa mga dokumento sa SSS, PhilHealth ug Pag-ibig Fund clearance.
“While the business sector understands the necessity of these requirements, and agrees with the city to make the people’s welfare a priority, they are requesting some consideration with regards to the time frame,†matud pa ni Dizon.
Matud pa sa konsehal buot nilang mamahimong business friendly ang siyudad.
Si Mandaue City Treasurer Regal Oliva nga nahinabi sa mga tigbalita miingon nga dili siya supak sa paghatag og lugway sa mga magpapatigayon. (Romeo T. Limpangog/EIM)
Namuyo sa Ermita covered court papahawaon
Papahawaon gyud sa kapitan sa barangay Ermita ning siyudad sa Sugbu ang 47 ka pamilya nga sharer ug renters nga nabiktima sa sunog sa Sitio Warwick Barracks, Brgy. Ermita niadtong Enero 11, nga kasamtangang nagpuyo sa basketball court ini unya og gawas na sa bagyong “Basyang.â€
“Wala na ko’y labot ani nila. Ako ning papahawaon wala na gyud pud tawon tay luna. Di na maayo nga hangtod sa hangtod. Akong mga batan-on dili na kaduwa og basket,†miingon si Felicisimo Rupinta, kapitan sa barangay Ermita.
Matod ni Marina Deligero, usa sa mga kasamtangang nagpuyo sa maong basketball court, nagproblema siya karon kun asa sila mopasilong.
“Wala gyud siya (Rupinta) kabutangan. Wala (kapuy-an). Ang ilang tent kuwang,†niingon si Deligero samtang naghilak.
Apan midepensa si Rupinta sa pag-ingon nga aduna siya’y plano nga ayuhon ang maong basketball court kun aduna na’y kwarta ang barangay.
“Ipatrabaho na. Niya unsaon man pagpatrabaho ana kun naa na sila diha,†tin-aw ni Rupinta.
Matod niya nahuna-hunaan ni Cebu City Mayor Michael Rama nga papuy-on sila sa Plaza sa maong barangay apan basin maguba kini. Adunay 77 ka tents nga gitanyag alang sa mga stall owners nga wala’y kapuy-an. Kun adunay sobra sa tents, mamahimong ihatag kini kanila.
Dugang niini, adunay 92 ka tindahan nga himuon ang kagamhanan alang sa mga manindahay nga adunay balay nga kapuy-an. Samtang 54 ka tindahan ang ibutang tunga-tunga sa Freedom Park ug Sitio Warwick Barracks, ug 24 sa Freedom Park ug 14 sa Sitio Warwick Barracks.
Duna say tag P10 mil nga cash assistance nga gisaad ang siyudad niadtong mga nanag-iya og mga balay diha sa maong lugar samtang P5mil usab sa mga renters. (/EIM)(BANAT NEWS)