CEBU, Philippines - Dili tinuod nga nakig-estorya sa tulo ka mga bata ang imahen ni Senyor Santo Niño diha sa sitio Sac 1 sa barangay Mactan, dakbayan sa Lapu-Lapu.
Kini matud pa sa report sa TV Patrol Central Visayas sa ilang pakighinabi sa kura paroko sa Mactan Parish Church nga si Padre Benjie Balsamo.
Matud pa nga si Balsamo nakig-estorya sa maong tulo ka mga bata nga giingong maoy nakakaplag sa maong imahen dihang namunit sila og basura ug nagduwa 100 ka metros gikan sa ilang panimalay.
Apan bisan pa sa maong kasayuran, nga daw namakak ang tulo ka mga bata, nagpadayon gihapon ang paghugop sa mga tawo.
Gani pwerte nang taasa sa linya sa mga tawong gusto nga makahikap ug makahawok sa imahen nga gibutang sa temporaryong kapilya sugod pa sa kaadlawon.
Aron usab nga hapsay ug malinawon ang linya sa mga tawo, nagbutang og mga tanod ang barangay. (/EIM)(BANAT NEWS)