OFW giluba sa uyoan nga maoy

CEBU, Philippines - Patay ang usa ka 35-anyos nga Overseas Filipino Worker (OFW) human kini unaya sa pagdunggab sa iyang uyoan kinsa giingong hubog ug nagmaoy niadtong Miyerkules sa gabii diha sa sitio Hilltop, barangay Lagtang, dakbayan sa Talisay.

Ang biktima mao si Oliver Castañares, residente sa maong dapit nakaangkon og samad dinunggaban sa wala ug tunga-tungang bahin sa iyang dughan ug patay na pag-abot sa Talisay City District Hospital.

Ang suspetsado mao ang uyoan sa biktima nga si Sixto Sayson, Jr., 62,kinsa nadakpan sa hot pursuit operation.

Si Sayson gikatakda kagahapong adlawa nga pasakaan og kasong pagpatay diha sa piskaliya sa siyudad.

Si PO2 Edwin Campomanes kinsa usa sa miresponde sa insidente nga nahinabi sa Banat News mibutyag nga sa wala pa mahitabo ang insidente giingong gibato sa hubog nga si Sayson ang balay sa biktima.

Gisita kini sa biktima apan wala damha sa biktima nga duna kini dalang kutsilyo ug gihansakan siya niini.

Matud ni Campomanes nga na-recover nila gikan sa suspetsado ang 16-pulgadas nga double bladed nga kutsilyo.

Ang biktima molarga unta og balik sa abroad sa sunod buwan diin kini nagtrabaho.  (BANAT NEWS)