CEBU, Philippines - Patay ang usa ka 5-anyos nga bata human natusak sa bala ang lawas niini dihang gipaulanan og bala ang ilang balay sa sitio Puntod, barangay Taghaginod, sa dakbayan sa Naga sa alas 10:00 sa miaging gabii.
Si PO1 Danilo Fernandez, desk officer, nga nahinabi sa Banat News miingon nga base sa imbestigasyon sa mga first responders ang biktima ug ang iyang apohan nga si Prima Cantorne nangatulog sa ilang balay.
Apan matud pa nga nakadungog og kasikas ang apohan sa biktima gikan sa gawas.
Sumala pa ni Fernandez nga may miaksyon og abli sa ilang pultahan maong mibangon ang apohan ug iyang giduot og balik ang pultahan.
Apan paglabay sa pipila ka gutlo nakadungog na lang sila og buto sa armas gikan sa gawas.
Mao na lay nakit-an sa apohan nga wa nay kinabuhi ang iyang apo nga natusak na sa bala, apan tungod sa kahadlok nga balikan sa mga gikatahapan wala na motingog ang apohan hangtud nga nabuntagan sila.
Sumala pa ni Fernandez nga buntag na sila napahibalo ug sa ilang pag-responde ilang gidala ang bata sa City Health sa dakbayan sa Naga ug didto na kini gideklarar nga dead on arrival ni Dr. Porferia Daclan.
Samtang padayon pa karon ang follow-up operation sa kapolisan sa responsable sa pagrakrak. (/EIM)(BANAT NEWS)