CEBU, Philippines - Nawad-an sa iyang motorsiklo ang usa ka lalaki dihang gitiunan kini og armas de fuego sa usa ka lalaki nga wala hiilhi samtang nangihi didto sa dalan H. Abellana, barangay Canduman, dakbayan sa Mandaue sa miaging alas 2:00 pasado sa kaadlawon.
Si PO3 Arnold Villacampo sa kapolisan sa Presinto 6 sa Mandaue City Police Office (MCPO) nga nagbase sa barangay Canduman miila sa biktima nga mao si Gilbert Sanchez, 24, nagpuyo sa barangay Pagsabungan sa maong dakbayan.
Matud pa ni PO3 Villacampo nga nagpaingon na nga mopauli sa ilang balay gikan sa trabaho ang biktima.
Apan sa iyang pag-abot sa dalan H. Abellana sa nahisgotang barangay, nanaog kini sa iyang motor kay nangihi.
Apan giingong usa ka wala hiilhing lalaki mikilid sa pagtion sa armas niini ngadto sa biktima. Gani sumala sa biktima nga nabati niya ang kabugnaw sa sumbohan sa armas nga gidul-it kaniya.
Unya gihunghongan siya nga “ayaw og palag part, aron dili malungag ning imong kilid kay motorsiklo ra among tuyo.â€
Si PO3 Villacampo nagkanayon nga ang kauban sa nagtion og armas sa biktima dali nga misakay sa motorsiklo ug dihang nakasakay na ang nanion sa armas mipasirit kini og padagan pahilayo sa maong lugar ug giingnan pa kuno ang biktima nga “part adto na mi paglakaw na lang.â€
Si PO3 Villacampo miingon nga ang biktima wala’y nahimo, hinungdan nga midangop kini ngadto sa kapolisan. (BANAT NEWS)