SWU nakawata’g himabaw sa P250 mil

CEBU, Philippines - Dul-an sa P250 mil ang kantidad  sa  salapi  nga  nasakiyo  sa usa ka  kawatan  nga  milungkab sa  accounting  office  sa  Southwestern University sa Villa Aznar, Urgello St. barangay Sambag 1 sa dakbayan sa Sugbo sa miaging  alas 10:00  sa gabii.

Ang suspetsado naila nga si Rommel Jayoma Sacal, 33, ulitawo, molupyo sa B. Rodriguez, barangay Sambag 2 dakbayan sa Sugbo.

Basi sa imbestigasyon sa kapolisan nga gipangunahan ni SPO2 Leopoldo Bauzon sa Theft and Robbery Section sa Cebu City Police Office , nga ang suspetsado nakasulod sa maong unibersidad pinaagi sa pagguba sa sliding window ug paglangkat sa puthaw nga nag ali niini.

Sa dihang nakasulod na ang suspetsado sa maong unibersidad, mideretso kini og sulod sa teller area ug giguba ang mga trangka sa teller 1 ngadto sa teller 5.

Nakuha sa susptesado ang dul-an P250,000.00

Sa follow-up operation nga gihimo sa kapolisan, nadakpan ang maong suspetsado sa barangay Ermita. Si PO3 Jodan Batucan sa Theft and Robbery Section sa Cebu City Police Office nahinabi sa Banat News, nakita ang suspetsado sa CCTV sa maong pagpanglungkab .

Sumala pa ni Batucan nga aduna pa’y pending nga standing warrant sa Fuente Police Station ang suspetsado.

Wala usab mabawi  ang kwarta nga iyang gikawat  ug gipasaka na  ang kaso batok sa suspetsado  kinsa  nagtingkagol  karon  sa prisohan. (/WC)(BANAT NEWS)