CEBU, Philippines - Gipasumitir og ilang mga litrato ang tanang mga polis nga nagpuyo sa Deca Homes Subdivision sa barangay Dumlog, dakbayan sa Talisay nunot sa nagpadayong imbestigasyon niadtong batang mireklamo nga gikulata og usa ka polis nga giingong nagpuyo sa maong subdivision.
Kahinumduman nga usa ka 16-anyos nga batang lalaki uban sa iyang ginikanan ang mianha sa Talisay City Police Station aron moreklamo sa pagkulata kaniya sa usa ka polis niadtong milabay’ng Sabado diha sa sitio Miramar, barangay Poblacion.
Si PO3 Violeta Godinez sa Talisay City Women and Children Protection Desk mibutyag sa Banat News nga si Superintendent Resty Santos mimando sa mga operatiba sa pagkuha og mga hulagway sa mga polis nga naa magpuyo sa maong subdivision.
Ang tanang hulagway ilang ipatan-aw sa biktima ug sa mga witnesses aron kini ilhon ug aron ilang mapasakaan og kaso.
Ang menor nangangkong nanghagpat siya og mga bato sa bas nga karga sa truck dihang wa niya tuyoa nga maigo ang usa ka polis nga nagsuot og uniporme ug nagsakay og puwa nga motorsiklo.
Giingong gipakanaog siya sa maong polis dayon gituok ug gisukmag ang tiyan. Kasong administratiba ug kriminal tungod sa kalapasan sa Akta Republika 7610 kon “child abuse†ang giandam nga kaso batok sa maong polis. (BANAT NEWS)