2 ka komprador’g shabu tiklo
CEBU, Philippines - Nasakmit sa kapolisan ang 13 ka pakete nga shabu gikan sa duha ka suspetsado nga ilang giatngan gikang nangompra niini sa Duljo, siyudad sa Sugbo kagahapon sa alas 3:00 sa hapon.
Ang nadakpan mao sila si Jestoni Tunacao Peralta alyas Toni, 25, ulitawo, nga taga purok Tamarins sa barangay Umapad, ug Benmen Caubat Catapon alyas Ben, 23, nga taga purok Kalubihan II sa barangay Umapad sa mao gihapong dakbayan.
Si SPO3 Marcos Noval Jr., sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga gilusad nila ang maong operasyon human nila madawat ang tawag sa usa ka concerned citizen labot sa duha ka lalaki nga nangumpra og shabu sa Duljo, dakbayan sa Sugbo.
Matud pa ni Noval nga gihatag sa caller ang kolor sa motorsiklo nga giluwanan sa duha ka tawo ug lakip na ang plate number, ang kolor sa helmet ug ingon ang kolor sa mga sapot nga gisul-ob niini.
Dugang pa ni SPO3 Noval nga gitug-an sa caller ang mga pinuy-anan sa duha ka lalaki nga maoy nakaaghat kanila sa pag-atang didto sa dalan Plaridel ug eskina sa dalan Batiller sa barangay Umapad sa maong dakbayan.
Sa paglabay sa motorsiklo nga mitukma sa kolor nga gitug-an sa caller, ingon man ang mga sapot sa duha ka lalaki nga nagsakay niini ila kining gipara.
Si SPO3 Noval midugang nga ang nagmaneho sa motor nga si Catapon nagdali sa pagkanaog sa motor kay midagan pahilayo sa maong lugar. Samtang si Peralta nga wala na makalihok maoy unang gigunitan ug nakuhaan sa mga ebidensiya nga gisulod sa gamay nga belt bag.
Si SPO3 Noval nagkanayon nga pagkahuman nila og posas kang Catapon, gitabangan nila og gukod si Peralta hangtud nga kini nadakpan,
Gidungan nila og balhug sa prisohan ang duha ka suspek. Ang kaso nga kalapasan sa Section 2 ug Section 11 sa Article II sa Republi Act 9165 kon Comprehensive Dangerous Drug Act maoy ilang giandam nga ipasaka batok sa duha nila ka mga dinakpan. (BANAT NEWS)
- Latest
