CEBU, Philippines - Usa ka Australiano ang gikuotan og P14 mil ug mahinungdanong mga papeles samtang nagsuroy-suroy sa Fuente Osmeña Boulevard, barangay Capitol Site sa alas 7:35 sa miaging gabii.
Ang biktima mao si Donald Kevin Stott, 70, biyudo ug kasamtangan nga nagpuyo sa Sta. Ana Capaculan, barangay Labangon sa dakbayan sa Sugbo.
Si Stott miingon nga kalit lang siyang giduol sa duha ka wala hiilhi nga mga tawo ug ang usa niini maoy milipat sa iyang atensyon samtang ang usa usab maoy mikuot sa iyang pitaka nga may sulod nga P14 mil ug mga importanteng butang gikan sa bulsa sa iyang purol.
Gawas sa kuwarta nawagtang usab ang iyang Australian driver’s license, commonwealth visa credit card, ug laing mga business cards.
Hangtod karon, nagpadayon gihapon ang kapolisan sa pagpangita sa duha ka mangunguot nga mibiktima sa maong langyaw. (BANAT NEWS)