Mga “mangunguot” gipletihan pauli sa ila

CEBU, Philippines - Gipletihan sa kapolisan pauli sa kaulohan ang mga miyembro sa usa ka grupo nga gidudahang mamiktima sa Sugbo atol sa Sinulog.

Si Ruth Padla, Ruth Ramos, lumad nga taga-Caagos, Cagayan ug kasamtangang  nagpuyo sa Labangon sa dakbayan sa Sugbo.

Sumala pa nga nadakpan si Ramos sa mga sakop sa Theft and Robbery Section sa Cebu City Police Office tungod kay duna kini gikuotan.

Dihang gisukit-sukit ang suspetsado sa kapolisan mitug-an kini nga duna pa kini kauban nga upat ka tawo nga didto miabot sa Patria de Cebu.

Busa daling miadto sa maong lugar ang kapolisan ug gironda ang maong mga tawo.

Aron sa paglikay nga makabiktima pa ang maong mga tawo sa mga lokal ug langyaw nga turista atol sa Sinulog gipletihan kini sa kapolisan pauli sa kaulohan.

Sumala pa nga  usa kini sa mga preventive measures nga gibuhat sa kapolisan aron malikayan nga mabiktima ang mga tawo sa kawat atol sa Sinulog.

Matud pa nga ang maong mga tawo gikan sa kaulohan ug mituyo og ari sa Sugbo human sa pista sa Nazareno sa Quiapo.

Naabot sa Sugbo ang maong grupo niadtong Enero 10 ug modus niini ang pagpanguot pinaagi sa pagdisturbo sa biktima niini dayong kuot sa ilang gamit. (/EIM)(BANAT NEWS)