CEBU, Philippines - Ang pamilya sa mga biktima sa natagak nga trak sa lungsod sa Alcantara sa miaging adlaw wala pa ka desisyon kun mopasaka ba og kaso batok sa suspetsado.
Human mamatay ang duha ka tawo ug naangol ang laing 39 sa natagak nga trak , ang mga kabanay sa mga biktima nagpadayon pa sa pagtimbang-timbang sa maong hitabo.
Ang suspetsado mao si Jesus Divelleres Fabellar, 39, molupyo sa barangay Bugho lungod sa Moalboal, nga driver sa trak.
Si SPO3 Salve Orillo sa Alcantara Police Station nga nahinabi sa Banat News, miingon nga maluoy usab sila sa suspetsado kay ila ra kining kaliwat.
Sumala pa ni Orillo nga biktima usab ang asawa ni Fabellar kinsa gidala sa tambalanan kay nabalian og bukog.
Naghuwat pa sila sa desisyon sa mga pamilya, sumala ni Orillo.
Kun kasohan man, posibling ipasaka nga kaso batok ni Fabellar mao ang reckless imprudence resulting to homicide and multiple physical injuries, matud sa kapolisan. (/WC)(BANAT NEWS)