CEBU, Philippines - Duha ang patay ug angol ang 39 ka tawo sa duha ka managlahing aksidente sa lungsod sa Alcantara ug sa lungsod sa Compostela kagahapong adlawa.
Sa Alcantara, natagak ang usa ka trak de karga nga padulong maglubong sa patay sa usa ka bakilid pasado alas 12:00 kagahapon sa udto sa barangay Lawaan.
Ang drayber sa maong dump truck naila nga si Jesus Divelleres Fabellar, 39, molupyo sa barangay Bugho sa lungsod sa Moalboal.
Matud pa ni PO3 Nestor Tonilon nga nahinabi sa Banat News nga padulong sa barangay Tunga sa lungsod sa Moalboal ang maong dump truck tungod kay naghatod kini og patay aron ilubong sa maong lugar.
Sumala pa ni Tonilon nga tungod sa kagamay sa dalan natagak ang ligid sa dump truck hinungdan nga mibalitok kini og katulo padulong sa ubos.
Dugang ni Tonilon nga duha ang namatay sa maong hitabo nga sila si Manuel Templado, 73, ug si Delfin Yodico, 41, molupyo sa barangay Bala sa lungsod sa Moalboal.
Matud pa nga didto miagi sa barangay Lawaan ang maong dump truck tungod kay duol ra man kini padulong sa barangay Tunga sa lungsod sa Moalboal diin adto ilubong ang patay.
Apan tungod kay dangog ang dalan tungod kay nag-ulan sa maong dapit nadakin-as ang ligid sa maong dump truck hinungdan nga natagak kini sa bakilid.
Samtang sa barangay Canamocan sa Compostela, 17 ka mga tawo ang nangaangol human naguba ang propeller sa usa ka pasaheroang jeepney nga nalimbuwad.
Ang maong jeepney gimaneho ni Rosilo Orque, taga Looc, Liloan padung sa amihanang bahin sa Sugbu dihang naguba ang propeller shaft sa maong pasaheroan ug nawad-an kini og control sa maong sakyanan.
Ang 17 ka mga pasahero pulos gidala sa tambalanan samtang gitanggong dayon ang drayber niini. (BANAT NEWS)