Opisyal sa PAF nakawata’g P22 mil nga mga butang

CEBU, Philippines - Mikabat  sa P22 mil ang  kantidad  sa  mga  butang  nakawat  gikan  sa  sakyanan  sa  usa ka opisyal sa Air Force   nga  misalmot  sa marathon  kagahapon sa kaadlawon.

Ang biktima naila nga si 1st Lt. Jeffren Sajuna, 32, kasamtangang nadestino sa Mactan Airbase sa dakbayan sa Lapu-Lapu. Matud pa ni PO2 Reynaldo Labating, desk officer sa Theft and Robbery Section sa Cebu City Police Office nga nahinabi sa Banat News nga  gibilin  sa  biktima  ang  iyang motorsiklo  didto  sa IT Park  sa Lahug.

Dihang nahuman na ang marathon  mibalik  siya  sa iyang  motor  ug  didto  iyang  nadiskobrehan  nga gilungkab ang U-box niini sa wala pa hiilhing tawo.

Nakuha sa kawatan ang  I-phone, military ID, Debit ug ATM Card, helmet ug P700 nga salapi sa biktima. Matud pa  ni PO2 Labating  nga mokabat og kapin sa P22 mil ang balor sa mga nakuha sa kawatan gikan sa U-box sa motor sa biktima.

Sa  laing bahin, nasakiyo  sa wala hiilhing  kiriwan  ang   CPU ug monitor  sa usa ka  estudyante didto  sa balay  nga  gipuy-an  niini   75 Veterans Drive sitio Maracas sa barangay Apas sa dakbayan sa Sugbo kagahapon  sa  kaadlawon.

Ang biktima naila nga si Rica Mae Primne, 18, tinun-an sa kolehiyo, molupyo sa samang lugar. Matud pa ni PO2 Labating, nga giguba sa kawatan ang sliding window sa kusina ug mideritso sa sala dayong kuha sa CPU ug sa monitor niini.

Wala  siya makamatngon  kay  nahinanok  siya  og katulog  uban  sa kabugnaw  sa panahon.

Kining  mga  kasoha  sa pagpangawat padayong  giimbestigar  sa kapolisan  karon,  matud  pa  ni  Labating. (BANAT NEWS)