CEBU, Philippines - Gusto sa konseho sa siyudad sa Talisay nga kontrolahon na sa hingpit ang mga firecrackers o pabuto sa nahisgutang syudad atol sa kasaulogan sa Pasko ug pagsugat sa Bag-ong Tuig. Kini tungod sa kadako sa problema nga nasinati sa syudad ug sa ubang mga lugar sa Sugbo diin daghan ang nabiktima sa pabuto itandi sa niaging tuig.
Si Talisay City Vice Mayor Romeo Villarante nagkanayon nga aduna nay napasar nga mga ordinansa nga nag-regulate ug nagdili sa paggamit og pabuto sa Pasko ug Bag-ong Tuig.
Apan miingon ang bise mayor nga wala kaayo kini ipatuman nga higpit sa kapolisan sulod sa pipila ka tuig ang nakalabay hinungdan nga ubay-ubay usab sa mga residente sa maong dakbayan ang nasamdan sa mga pabuto niadtong Pasko ug sa pagsugat sa Bag-ong Tuig.
Giangkon hinuon ni Villarante nga base sa iyang naobserbahan, iyang nakita nga lisud kaayo ang pag-ban sa pabuto sanglit dili sayon nga langkaton ang tradisyon ug batasan sa taga Talisay ug mga Filipino nga magpabuto sa Pasko ug Bag-ong Tuig.
Kini tungod kay gituohan sa kadaghanan ang estorya nga ang pabuto kuno maoy pagtawag sa dibuwenas ug pagpaabot sa demalas.
Apan kusganong gisugyot ni Villarante ang paggamit og turotot agi og pagsaba-saba atol sa kasaulogan sa Pasko ug pagsugat sa Bag-ong Tuig base sa napasar nga lokal nga balaodnon sa syudad. (/WC)(BANAT NEWS)