CEBU, Philippines - Ang Department of Science and Technology sa Central Visayas (DOST-7) miklaro nga si Dr. Carina Galvez Lao dili maoy gitudlo nga bag-ong regional director sa ilang buhatan. Kini tungod kay sa pagkakaron wala pa gayud sila’y gitudlo nga bag-ong molingkod isip regional director. Kini may kalabotan sa migawas nga balita nga napatik niining maong pamantalaan niadtong miaging Enero 2 ning tuiga diin nasaysay nga si Lao maoy milingkod isip bag-ong regional director sa DOST 7.
Apan nasayop ang maong impormasyon tungod kay base sa kasayoran nga na-post sa website sa DOST 7, si Lao natudlo isip bag-ong Executive Director sa Governing Board of the Department of Science and Technology-National Research Council of the Philippines ug dili isip DOST-7 Regional Director.
Matud pa ni Vicente Cuyme sa DOST-7 nga nahinabi sa Banat News kagahapon nga dili gayud tinuod nga si Lao maoy regional director tungod kay wala pa silay Director sa pagkakaron. Hinuon ang ilang acting officer-in-charge karon mao si Engr. Edilberto Paradilla.
Tungod niini ang responsableng reporter ug ang tibuok Banat News nangayo og despensa ug usab mipasalamat ngadto ni Cuyme kinsa mihatod sa tinud-anay nga impormasyon aron pagtanus sa maong sayop alang sa katawhan. (BANAT NEWS)