CEBU, Philippines - Patay ang usa ka barangay kagawad ug naangol ang iyang kauban human sila kalit gipaulanan og bala sa duha ka mga lalaking nagmotor diha sa Barangay Polog, sa lungsod sa Consolacion kagahapon sa hapon.
Ang namatay mao si kagawad Rey Balaba, 50, tungod sa mga samad pinusilan sa iyang kalawasan. Nadala pa siya sa North General Hospital apan namatay gihapon paglabay sa upat ka oras.
Si Balaba maoy kanhi barangay kapitan sa maong barangay sud sa tulo ka termino ug ning uwahi lang nga barangay elections nakadaog sa pagka-barangay kagawad. Siya nagtrabaho isip supervisor sa Norkis Motors.
Samtang ang kauban niyang naangol mao si Henry Capao, nga iyang silingan kinsa kaestorya lang sa biktima niadtong tungora. Si Capao nakaangkon og paso sa iyang tiyan ug gidala gihapon sa maong tambalanan.
Sumala pa sa imbestigasyon sa kapolisan, si Balaba, Capao ug ang silingan nilang si Pedrito Padayugdog nagtabi sa gawas nga bahin sa balay ni Balaba duol sa iyang tindahan niadtong tungora.
Diha-diha miabot ang usa ka Honda Wave nga motorsiklo nga dunay nakakabit nga ‘for registration’ plate.
Ang angkas niini diretsong mipusil kang Balaba sa makadaghang higayon ug nakaangol kang Capao. Si Padayugdog daling nakadagan ug nakatago.
Sila si Padayugdog ug Capao mibutyag nga gagmayon o yagpison ang mga gunmen ug pulos nagtaptap og sinina sa ilang mga nawong.
Na-recover sa kapolisan ang unom ka mga basiyo sa kalibre .45 pistola ug upat ka slugs diha sa crime scene.
Si PO3 Arthur Ariate, ang imbestigador sa maong kaso mibutyag nga dili pa nila karon masalikway ang anggulo nga may bulok politika ang maong pagpatay, apan posible usab nga duna kini personal nga nakaaway si Balaba.
“Ingon ang asawa nga duna ni bingkil sa pag-umangkon kay gikuha kuno ang DT nga motor ani unya data-datahan lang kuno pero hangtod ron wala gihapon bayri pero dugay na man pud to,†matud pang Ariate sa phone interview sa The Freeman. Si Ariate midugang nga dili pa hinuon sila mosalig sa mao lamang nga impormasyon sa ilang imbestigasyon tungod kay nahitabo kini usa ka tuig na ang nakalabay.
Dako hinuon ang pagtuo sa kapolisan nga ang mga gunmen mga residente ra sa maong lugar kay nagtabon man sila og mga nawong. “Possible gun-for-hire pero kaila ra sa taga-diha kay nagtap-tap man,†matud pang Ariate.
Duna nay usa ka tawo nga ilang giimbitar kagahapon aron pangutan-on kalabot sa maong pagpatay.
Samtang ang Provincial Intelligence Branch mipadala na og dugang mga sakop aron motabang sa imbestigasyon sa Consolacion police ug aron mailhan ug madakpan ang mga gunmen ug ang posibleng utok sa maong krimen. (Ria Mae Booc sa The Freeman/EIM)