Drug test sa CARCAR CH employees

CEBU, Philippines - Ang mga job order ug casual nga kawani sa city hall sa dakbayan sa Carcar gipaubos kagahapon sa buntag og random drug test.

Kini usa sa mga rekisitos sa ilang kontrata sa ilang pagpanarbaho diha sa city hall.

Si Candice Acuna, Public Information Officer (PIO) sa siyudad mibutyag nga atol sa gipahigayong general assembly sa mga kawani sa city hall kagahapon sa buntag si Mayor Nicepuro Apura surpresang mipahibawo kabahin sa random drug test.

Gibutyag ni Acuna nga ang mga pultahan sa lugar diin gipahigayon ang drug test gipangsiradohan aron walay makagawas una mipahibawo ang mayor sa maong drug testing.

Sobra sa 300 ka mga job order (JO) ug 79 ka mga casual employee sa city hall ang gipaubos sa drug test.

Matud ni Acuna nga kadtong wala mopaubos sa drug test ug kadtong mapositibo sa ginadiling drugas taktakon gyud kini sa serbisyo.

Si Acuna nagkanayon nga ang mga regular nga kawani sa city hall i-schedule usab unya nga mapaubos sa drug test.

Ang mayor mitanyag kini sa pagpagamit sa mga sakyanan diha sa motor pool nga masakyan sa mga kawani paingon ngadto sa accredited nga drug testing centers sa siyudad aron magpa-drug          test.

Dugang ni Acuna nga ang mayor naalarma kabahin sa nadawat niining reports nga dunay mga kawani sa city hall nga maggamitan og ginadiling drugas.

Ang mayor sa Carcar seryoso sa iyang kampaniya batok sa ginadiling drugas. (/EIM)(BANAT NEWS)