CEBU, Philippines - Sa milabay nga pipila ka adlaw ning tuiga, daghan na ang mga kaayohan ang gihatag sa matag ahensya sa gobyerno sa nasud nga nakahatag og dakong benepisyo dili lamang sa kinabuhi sa publiko kundi lakip na sa ilang panginabuhi.
Sama sa pagsaulog sa Pilipinas isip National Year of Rice ubos sa Presidential Proclamation No. 494 nga gilagdaan ni Presidente Benigno Aquino III.Kini gitumong alang sa pagpaabunda sa bugas humay sa nasud , busa dili na angay nga mamalit og bugas sa gawas kay ang Department of Agriculture (DA) pinaagi sa pagpanguna ni DA Secretary Proceso Alcala, mipatuman og maayong mga palisiya ug sistema nga makapahimo sa nasud nga Pilipinas nga Rice Self Sufficiency ning tuiga.Kini tataw nga natuman ug natagamtaman sa mga molupyo sa nasud ning tuig 2013.
Ang Department of Social Welfare and Development sa Central Visayas (DSWD-7) may giumol usab nga programa nga gitawag og Modified Conditional Cash Transfer (MCCT) diin nagtumong sa paghatag og tabang ngadto sa mga pamilya nga walay mga balay ug nanimuyo na lang sa daplin sa kadalanan tungod sa tumang kakabos. Padayon nga napahimuslan sa mga kabus nga pamilya ang programa sa DSWD nga 4Ps o Pantawid ng Pamilyang Pilipino Program.
Sa maong programa matag pamilya nga benepisyaryo may madawat nga salapi matag buwan gikan sa kagamhanan isip abag kanila nga makapatungha sa ilang mga anak sa eskuylahan. Kaliboan ka mga pamilyang Pilipino ang nakapahimus niining maong programa.
Sa laing bahin, gilusad usab sa Department of Trade and Industry (DTI) ang programa nga nagpasidaan ngadto sa mga mamaligyaay og helmet nga walay ICC sticker, subay sa implementasyon sa Helmet Law.Sa maong balaod ang mga motorista gimanduan sa pagsul-ob og helmet nga adunay ICC sticker. Kung mapakyas ang usa ka mamaligyaay sa pagtuman sa maong mando, makamulta kini og dili mominus P10,000 apan dili molabaw sa P20,000.
Nahitabo usab ang pagpanumpa sa 20 ka mga buta kinsa nahimong lisensyado sa pagka therapist sa Committee of Examiners for Massage (CEMT) sa Department of Health (DOH). Kini human sila mopasar sa eksamin nga gipahigayon sa DOH dili pa dugay.
Ang Department of Labor and Employment (DOLE-7) uban sa multi-agency group milusad og kampanya kalabot sa pagpausbaw sa bag-ohay pa lamang naaprobahan nga "Kasambahay Law".
Ang giisip nga kasambahay naglakip sa katabang sa panimalay, yaya, cook, gardener, laundry persons ug usab mga batan-on nga indibidwal nga nanarbaho isip domestic helpers kinsa nagpanuigon og 15 anyos apan ubos sa 18-anyos ang panuigon kinsa matag adlaw nga nanarbaho isip domestic worker. Sa laing bahin giangkon sa mga kadagkoan sa kasanihan sa rehiyon 7 nga nalipay sila sa bag-ong bakuna batok sa dengue.
Nagkanayon ang DOH 7 nga ilang gihagit ang kompaniya nga nakadiskobre sa maong bakuna nga ipadali kini paghuman aron daghang kinabuhi ang malibre. Samtang gibutyag sa kapolisan nga mibahar ang krimen niining tuiga itandi sa tuig 2012.
Si PSupt. Renato Dugan, Public Information Officer (PIO) sa Police Regional Office (PRO)7 nagkanayon nga nahimo kini tungod sa mga intervention ug mga programa nga gilusad sa kapolisan sa rehiyon. Samtang ang pagkunhod sa presyo sa pagkaon ug ubang palaliton nakab-ot sa bulan sa Hulyo karong tuiga, sumala pa sa National Economic & Development Authority (NEDA).
Usa kini ka timailhan nga nagmalampuson ang gobyerno pagkab-ot sa 3.0 hangtud 5.0 porsiyento nga inflation rate karong tuiga.
Subay sa taho sa National Statistics Office (NSO) nga ang inflation rate nga natala sa bulan sa Hulyo 2013 mikunhod og 2.5 porsiyento kung itandi sa miaging tuig.
Sa laing bahin usa ang Department of Social Welfare and Development (DSWD) walay puas usab nga mibubo sa ilang dakong tabang ngadto sa mga biktima sa miaging linog niadtong Oktubre 15 ning tuiga diin daghang mga panimalay ang nagusbat ug daghang mga pamilya usab ang nawad-an og kapuy-an lakip na ang panginabuhian.
Tungod niini ang nasudnon nga ahensya sa gobyerno lakip na ang pribadong sektor ug mga may malumong kasingkasing nga taga gawas sa nasud walay puas nga mitanyag sa ilang dakong tabang ngadto sa matag biktima niini. (/WC)(BANAT NEWS)