Lain na usab grupo sa mga papuans nag-unay og rambol

CEBU, Philippines - Nasikop sa kapolisan ang upat ka mga langyaw human kini mag-unay og away sa  dalan Juan Osmeña corner Gen. Maxilom Avenue sa dakbayan sa Sugbo pasado alas 5 sa buntag sa miaging adlaw tungod sa kahubog niini.

Ang maong mga langyaw naila nga sila si Jayjay Kerepa, Emmanuel Nagupi Naemon, Israel Wanqama Waraqu, Nigel Gwingin Dondo nga naghupot og student visa nga gikan sa Papua New Guinea. Dili lang kini maoy unang higayon nga nalambigit sa kasamok ang mga Papuans dinhi sa Sugbu, sayo ning tuiga, pipila kanila ang nakakita og karambola, dunay nagmaoy ug nanghasi lakip na ang anak sa usa ka opisyal sa ilang gobiyerno.

Matud pa nga tungod sa kahubog sa maong mga langyaw nag-unay kini og sinumbagay sa nahisgotan nga dapit sayo sa buntag. Ang mga concerned citizen daling mitawag sa kapolisan. Ang Mobile Patrol Group sa Cebu City Police Office daling misikop sa mga suspetsado ug gidala sa Fuente Osmeña Police Station ug kasamtangang natanggong.

Gibuhian ra usab sila sa kapolisan human kini nakabayad sa multa tungod sa kalapasan niini sa City Ordinance No. 1229 o Drunkenness. (Bryner Diaz/EIM)

Duha ka maestra gitulis, tulisan nadakpan dayon

Nasikop sa mga sakop sa Carbon Police Station ang usa ka tulisan samtang nakaipsot ang kauban niini nga mitulis sa duha ka pasahero sa 04C nga jeep diha sa Forbes Bridge, barangay Pahina Central sa dakbayan sa Sugbo sa alas 5:20 kagahapon sa hapon.

Ang suspetsado naila nga si Ian Christopher Talarion Batidos, 21, molupyo sa sitio Tangke sa Alaska Mambaling samtang nakaikyas ang kauban niini nga si Kimby Doble Bacalso, 19, molupyo sa sitio Tinabangay sa Alaska Mambaling.

Samtang ang biktima naila nga sila si Joy Olinares, 36, molupyo sa barangay Lahug ug si Genevieve Yburan, 36, molupyo sa Abellana Extension sa barangay Guadalupe, pulos mga public school teachers. Matud pa sa mga biktima nga nahinabi sa Banat News nga nanakay ang duha ka tulisan diha sa dalan Leon Kilat ug dihang duol na sila sa tulay sa Panganiban mideklarar og tulis ang duha dayon mition sa kalibre .38 nga armas ngadto kanila.

Gimandoan sila sa mga tulisan nga “ihatag nang inyong singsing,” ug tungod sa ilang kahadlok ilang gihubo ang ilang singsing ug pagkahuman kalma ra kaayong nanganaog ang duha.

Dali dayong misiyagit ang duha ug nangayo og tabang ug naatlan nga diha ang nagpatrolyang  team ni PO3 Antonio Alester  Tejero hinungdan sa pagkasikop ni Batidos.

Narekober gikan ni Batidos ang .38 nga revolver ug ang duha ka singsing sa mga biktima nga nagkantidad og kapin sa P20 mil.(/EIM)(BANAT NEWS)