Mokuha sa asawa napunggit sa trak patay
CEBU, Philippines - Patay ang usa ka bana nga padulong magkuha sa iyang asawa gikan sa trabahoan niini human kini nabanggaan sa usa ka trak sa Barangay Canamucan sa lungsod sa Compostela pasado alas-4 sa miaging hapon. Ang biktima naila nga si Ronald de la Torre, 43, molupyo sa dalan R. Palma sa dakbayan sa Sugbo. Samtang ang suspetsado naila nga si Quirico Salacot, 42, molupyo sa barangay Banhigan sa lungsod sa Badian.
Matud pa ni PO3 Michael Magallon, imbestigador, nga ang biktima sakay sa iyang motor padulong sa dakbayan sa Danao aron sa pagkuha sa iyang asawa nga nagtrabaho sa Cebu Mitsumi Incorporated sa Barangay Canamucan.
Samtang ang suspetsado nagmaneho sa trak nga padulong maghatud og feeds sa amihanang Sugbo.
Matud pa nga pag-abot sa Barangay Canamucan mi-overtake si dela Torre sa trak hinungdan nga nabanggaan ang motor nga gisakyan niini nga miresulta sa pagkalabay niini sa dalan ug nakaangkon og grabing kadaot sa iyang lawas.
Matud pa nga wala kabantay ang drayber sa trak nga nawad-an og control si de la Torre sa iyang motor ug naigo kini sa iyang trak, dayon katumba niini.
Daling gidala sa Danao Provincial Hospital ang biktima apan gideklarar kini nga patay na sa attending physician.
“Dako man ang truck unya wala siya (Salacot) kabantay nga dunay naigo sa kilid sa sakyanan,†matud pa ni Magallon.
Matud pa ni Magallon nga ang biktima naligsan sa trak nga gimaneho sa suspetsado. “Ang helmet pwerteng gubaa gyud unya grabe ang dugo sa dalan,†dugang ni Magallon.
Kasamtangang natanggong sa karsel sa lungsod sa Compostela ang suspetsado samtang giandam pa ang kasong reckless imprudence resulting to homicide nga ipasaka batok kaniya. (BANAT NEWS)
- Latest
