529 ka sundawong Koreano miabot sa Sugbo

CEBU, Philippines - Mikabat  sa 529 ka mga sundalong Koryano uban ni Korean Ambassador to the Philippines Lee Hyok   ang  miabot sa Sugbo kagahapon  aron  motabang  sa  pagpabarug og balik sa mga dapit nga naapektohan sa bagyong Yolanda sa Leyte ug Samar.

Matud pa ni Ambassador  Lee  nga  luwan sa 747 Korean Air ang 300 ka mga sundalo nga miabot sa Mactan Benito Ebuen Air Base  (MBEAB) sa dakbayan sa Lapu-Lapu ug 229 ka mga sundalo usab ang luwan sa ilang Korean Navy ship   nga  midunggo sa Cebu International Port (CIP).

Ang maong mga sundalo gilangkoban sa mga medical ug engineering personel sa militar sa nasud sa Seoul South Korea diin mission niini ang pagtabang sa mga biktima sa bagyong Yolanda sa lungsod sa Palo, Tulusan, Tan-awan ug ubang dapit sa  Leyte  ug  Samar. Gibanabanang moabot sa unom ka  buwan ngadto sa usa ka tuig   ang  pagpabilin sa  maong  mga  sundawo  dinhi  alang sa ilang humanitarian mission.

Gipasabot ni Lee nga dako ang natabang sa Pilipinas atol sa gubat tali sa North ug South Korea niadtong tuig 1950's diin 7,520 ka mga Pilipinong sundalo ang  gipadala  ngadto sa South Korea.

 Ang maayong relasyon tali  sa Korea ug Pilipinas  nagpadayon  karon  hinungdan nga ania sila aron pagtabang sa mga biktima  sa kalamidad.

Si DND Undersecretary Eduardo Batac  maoy misugat sa mga tropang  Korean. (BANAT NEWS)