Huwes sukiton sa gipakubsan nga allowance

CEBU, Philippines - Ang mga opisyal sa dakbayan sa Sugbo nagplano karon nga makigtagbo sa mga huwes sa Regional Trial Court (RTC) ug  sa Court of Appeals (CA) aron sila suknaon unsay buhaton nga gipakunhoran man ang ilang budget alang sa ilang  binuwan nga allowance.

 Matud ni Cebu City Administrator Jose Marie Poblete nga wala pa hinoon sila makadawat og kopya sa giaprobahan nga Appropriation Ordinance diin giibanan ang budget alang sa binuwan nga allowance sa mga huwes ug justices.

 Ang mga konsehal sa dakbayan gidak-an ra kaayo sa gihatag nga allowance sa mga huwes ug justices nga kun pila ang ila nga “basic pay” gikan sa Supreme Court ingon usab niini ang kantidad nga ihatag sa City Hall nga allowance matag buwan.

 Dunay mga huwes nga nagsweldo og kapin sa P40,000 ang buwan samtang ang mga justices moabot og kapin sa P50,000.

 Bisan og giibanan sa City Council ang gisugyot nga budget ni Mayor Rama apan mahimong dagku gihapon ang ilang binuwan nga allowance nga  moabot og P25,000.

 Usa ka environmentalist-lawyer mihulagway sa mao nga paghatag sa dakbayan og dagku kaayo nga allowance sa mga huwes, justices ug mga fiskal nga usa ka pag-usik-usik lang sa salapi.

 Matud ni Atty. Gloria Estenzo-Ramos nga ang mao nga dakung kantidad mahimo unta nga magamit sa mga proyekto nga kapahimuslan sa katawhan.  (Rene U. Borromeo/WC)

Biktima sa pabuto misaka’g 37 porsiyento

Ang kaso sa  biktima sa pabuto sa pagsugat sa Pasko karong tuiga misaka ngadto sa 37 porsiyento itandi sa milabay’ng tuig, base sa talaan sa Regional Epidemiology and Surveillance Unit (RESU)-7.

Mikabat  sa siyam ang kasong natala sa dakbayan sa Sugbo, duha sa dakbayan sa Lapu-Lapu, duha sa dakbayan sa Mandaue, usa sa lungsod sa Medellin, usa sa lungsod sa San Remegio ug tulo sa dakbayan sa Talisay.

Ang mga nabuthan nagpangidaron gikan sa 3-anyos ngadto sa 65.

Giingong sagad sa mga pabuto nga nakaangol sa mga biktima mao ang kwitis, piccolo, pirate, sparkler, thick long, triangle ug whistle bomb.

Base usab sa talaan sa RESU nasuta nga duha sa mga biktima ang naputlan gyud sa mga kamot, 13 ang wala ra maputli sa mga tudlo, upat ang nabuthan sa mata ug usa ang naigo sa saag nga bala.

Sa milabay’ng tuig walo lang ang mga nabiktima sa pabuto sa pagsugat sa Pasko samtang karong tuiga miabot ngadto sa 21 ang nabiktima.

Ang hepe sa RESU-7 nga si Rennan Cimafranca subling mipahimangno sa publiko nga mag-amping aron dili mabiktima sa pabuto sa pagsugat sa Bag-ong Tuig. (BANAT NEWS)