Christmas party sa kabataang kabus gisaulog

CEBU, Philippines - Gisaulog kagahapon ang  Christmas Party sa 650 ka mga bata nga giilang anak sa kabus gikan sa  27 ka barangay sa dakbayan sa Mandaue   uban sa tema  nga “A Clean Mandaue Starts with i-Kids.”

Ang maong programa nga gipahigayon sa sulod sa Mandaue City Cultural and Sports Complex sa sitio Tribunal sa barangay Centro  malampuson  pinaagi   sa pagpanguna  sa Mandaue City Committee for Children’s Protection (MCCPC) ug Kaabag Inc., City Social Welfare Services nga ubos usab sa suporta sa kagamhanan sa maong dakbayan.

Si  Mayor Jonas Cortes  mipadayag   nga  angay  ipadayon  ang  maong  programa  nga gitumong alang sa kaayohan  sa mga kabataan.

Ang unang ginang sa dakbayan nga si Mrs. Sarah Cortes nga maoy chairperson sa MCCPC nga nahinabi sa Banat News miingon nga  natigom  ang  maong  mga  bata  pinaagi  sa mga  kapitan sa  27 ka barangay  sa dakbayan.

Gitataw niya nga tungod sa  7.2 magnitude nga linog niadtong Oktubre 15 niining tuiga, wala usab mahinayon ang  pasundayag  sa   horror booth  kansang  kinitaan  mao  unta   ang kuhaan  sa gasto  alang  sa  Christmas party sa kabus nga kabataan.

Hinuon si Mrs.  Cortes miingon nga bisan sa kakulang sa gahin  sa maong programa sa gihapon ila   kining gipatuman   kay  miabag  man  ang  pribadong  sector. Naglakip sa mga ayuda nga gihatag sa pribadong  mga negosyante mao ang mga pagkaon, parlor games,  mga  duwaan,  sapot  ug  uban  pa. (BANAT NEWS)