CEBU, Philippines - Namatay ang 11 anyos nga batang lalaki human dasmagi sa usa ka mini bus sa National Highway sa sitio Lutao, barangay Estaca ,lungsod sa Compostela alas 3:14 sa miaging hapon.
Ang biktima nailhan nga si Arnel Talingting, molupyo sa barangay Mabini. Samtang ang nakadasmag mao ang Isuzu mini bus nga gimaneho ni Paulino Enriquez, nga taga barangay Sac-on, lungsod sa Carmen.
Base sa imbistigasyon nga gihimo ni PO3 Michael Magallon, traffic investigator nasuta nga ang Isuzu mini bus nga aduna’y plate number nga GWR-339, nagdagan padulong sa Carmen.
Apan sa pag-abot sa naasoy’ng lugar kalit lang milabang ang biktima hinungdan nga nabanggaan kini. Naigo ang biktima sa walang bahin sa atubangan sa sakyanan ug nalabay kini.
Nakaangkon og daghang samad sa nagkalain-laing parte sa iyang lawas nga maoy hinungdan sa hinanali niyang kamatayon. Gisuwayan pa kini og dala ngadto sa Danao Provincial Hospital apan gideklarar kining dead on arrival sa doktor nga miatiman. Natanggong na karon sa Compostela Police Station ang suspetsado ug nagpaabot sa kaso nga ipasaka batok kaniya. (BANAT NEWS)