CEBU, Philippines - Patay ang usa ka amahan nga gitigbas sa iyang anak human sa ilang mainit nga panaglalis sa alas 12:00 sa udto sa miaging adlaw sa sitio Suton, Barangay Pangdan sa dakbayan sa Naga.
Ang biktima naila nga si Ananias Marquez, 51, molupyo sa sitio Suton, Barangay Pangdan sa dakbayan sa Naga samtang ang suspetsado naila nga si Marjon Marquez, 32, molupyo sa samang lugar, anak sa biktima.
Matud pa ni PO2 Ian Puitayon, usa sa mga nirespondi sa maong alarma nga nahinabi sa Banat News, nagkalalis ang amahan ug anak sa miaging udto.
Gikatahong naugkat ang kasuko sa anak ngadto sa iyang amahan tungod kay nasakpan niya kini kaniadto nga nakighilawas sa iyang asawa niadtong bulan sa Hulyo, apan napasaylo ra niya kini.
Tungod sa kasuko sa suspek gitigbas niini gamit ang 17-pulgada nga sundang ang amahan sa nagkalain-laing parte sa iyang lawas.
Nadala pa sa tambalanan apan pipila ka oras ang milabay nakabsan kini sa iyang kinabuhi.
Miingon ang polis nga gihuwat pa nila ang affidavit sa mga kabanay sa biktima aron mapasakaan og kasong parricide ang suspek nga anak niini.
Nanawagan ang kapolisan nga motunga ang mga kabanay niini tungod kay nagkinahanglan pa sila og mga papeles nga magpamatuod nga anak sa biktima ang suspek nga kasamtangang gitanggong sa Naga Police Station. (BANAT NEWS)