Duha ka mga lalaki patay sa pagpamusil sud sa tigbakayan

CEBU, Philippines - Patay diha-diha ang duha ka mga lalaki human kini napusilan sa duha ka wala pa mailhing tawo sa ruwedahan sa tigbakayan pasado alas 3:00 sa miaging hapon sa sitio Paraiso sa barangay Tinubdan sa lungsod sa Daanbantayan.

Ang mga biktima naila nga sila si Ricky Lauron, 38, tigtaod og tari, molupyo sa barangay Bagay sa Daanbantayan ug si Harry Neri, 40, molupyo sa barangay Dalingding sa lungsod sa Medellin.

Sumala pa ni PO2 Carlo Mondejar, desk officer sa Daanbantayan Police Station nga nahibabi sa Banat News nga pista sa maong barangay  maong nanigbakay ang mga biktima.

Apan tunga-tunga sa kahugyaw sa tari, duha ka wala mailhing mga lalaki ang kalit nga mipabuto og mga armas sa ruwedahan hinungdan nga nabungkag ang mga tawo.

Samtang ang duha ka mga suspetsado dali usab nga midagan sa kasagbotan ug wala na mahibaw-i kun asa kini padulong.

Nakit-an na lang nga nahagba na ang mga biktima nga nagkadugo nga wala nay kinabuhi diha sa tigbakayan ug patay na kini dihang gihiling ni Dr. Merly Visda ang Municipal Health Officer sa lungsod.

Dihang gihiling sa doktor ang patay nga lawas niini nasuta nga nakaangkon og samad sa iyang liog ug tuo nga ilok si Lauron samtang si Neri nakaangkon sab og samad sa wala nga ilok.

Narekober sa kapolisan sa crime scene ang duha ka kabhang sa .9mm ug usa ka kabhang sa kalibre .45 nga pistola.

Padayon pa karon ang kapolisan sa paghimo og imbestigasyon sa maong insidente. (BANAT NEWS)