Mi-Resign

CEBU, Philippines - Mikanaog na sa iyang pwesto isip Customs Commissioner sa Bureau of Customs si Ruffy Biazon kagahapon upat ka adlaw human siya giapil sa gipasakaan og kaso sa pork barrel scam.

Sa usa ka gipatawag niya nga press briefing,  si Biazon, kinsa kaalyado sa presidente ug kanhi kongresista sa Muntinlupa  mipasabot nga iyaha kining gihimo aron panalipdan ang iyang pangalan ug iyang pamilya tunga-tunga niining mga alegasyon nga nakadawat siya og kickback sa maong scam.

Si Biazon naapil sa 34 ka mga tawo nga gikasohan sa National Bureau of Investigation diha sa buhatan sa Office of the Ombudsman niadtong adlaw nga Biyernes. Matud pa ni Biazon andam siyang moatubang sa maong kaso.

Sumala pa nga misumitir si Biazon sa iyang irrevocable resignation kang Aquino atol sa ilang meeting kagahapon sa hapon.

Matud pa ni Aquino “especially concerned” si Biazon sa pangalan sa ilang pamilya nga maapektahan tungod sa maong kontrobersya ug ang labing maayong buhaton niini mao ang pagdepensa sa iyang kaugalingon ug aron usab dili maduhig sa kontrobersya ang Bureau of Customs (BOC).

“In his letter to me, and in our conversation, he explained that it would be best to provide the Secretary of Finance the widest leverage and flexibility to steer the future direction of the Bureau of Customs, in light of the controversy brought about by Commissioner Biazon's inclusion in the complaint of the National Bureau of Investigation before the Ombudsman,” sumala pa sa pangulo.

Mapasalamaton hinuon si Aquino kang Biazon sa serbisyong nahatag niini sa nasud ug nanghinaot siya nga malampuson ang kinabuhi niini isip usa ka pribadong tawo.  (BANAT NEWS)

 

Show comments